La Usc di Ladins

Da l’èrt umola… a la scienza nobola l’é nasciù na picola azienda agraria: »Non solo di terra«. No demò de tera, ma con l cher tel ciel, l’é la filosofia che à vidà l grop Fies de la Lum de la Sociazion Mariana ‘Regina dell’Amore’ a meter sù chesta picola realtà te Fascia. 

La se cruzia de la coltivazion e la vendita de prodoc de la tera, prodoc che cresc ti orc che i rencura con tecniches respetouses de l’ambient: nia concimes chimics, demò grascia, e semenzes e piantes che cresc a na vida deldut naturèla. »Fajon dut col lurier de noscia mans, sion picoi e podon amò se l permeter. Nosc temp l’é l temp de la tera« se lec su la piata internet.

L responsabol l’é Gabriele Pederiva. El ne conta che i à orc e ciampes mingol dut intorn: sa Roisc a Soraga, ti Ciancoai olache l’é stat metù jù soraldut patac e capusc, a Sèn Jan, sun Col da Faé. Chiò l’é stat endrezà picoi toc de ort da dèr a fit ajache vegn sport l met a chi che à temp e pascion de se rencurèr so pìcol ort e de poder se tor sù chel che che cresc. »L’é foresć che stasc magari ence n meis te val che ne à domanà l’ort a fit – disc Gabriele – e l’é ence jent del post che no à n ort sie«.

De più su La Usc stampèda de vender ai 16 de messèl.  (Monica Cigolla)