La Usc di Ladins

»N muie peissa che la storia de Chernobyl sie fenida con l’azident a la zentrala. Nia de più faus. La storia de Chernobyl taca proprio coi 26 de oril del 1986.« L’à i eies sgalizenc Francesca Gorzanelli canche la rejona de Chernobyl, de che che l’é sozedù enlouta e de coche dut l’é mudà te chisc egn. L’é passà 35 egn da chel dejaster nuclear che à segnà la storia geo-politica del mond entriech e la vita de milions de persones. E amò no se cognosc e se enten ben duc i fac.

Francesca Gorzanelli, fotografa e reporter, à pissà de i contèr travers na piata internet, n blog e na mostra dal titol »Diarie de n viac a Chernobyl« che en vender ai 9 de messèl é stata inaugurèda te Comun de Soraga. Francesca Gorzanelli te chisc egn la se à cruzià ence de l’acolienza di bec de la Bielorussia, raion che é stat contaminà debel da la radiazions e per chest l’inaudazion de la mostra e la sera de informazion de en vender te La Gran Ciasa, l’é stat ence l’ocajion per l comitat de Fascia de la sociazion trentina ‘I didon a viver’ de se fèr cognoscer travers la paroles de la presidenta Carmen Lorenz, che à recordà che chest an l’é 20 egn de acolienza te Fascia.

Chesta mostra per no desmentièr e mantegnir viva la memoria resta averta te Comun de Soraga fin ai 6 de aost dal lunesc al vender da les 9.00 a les 12.00 e da les 14.00 a les 17.00, de mèrtesc e de jebia ence da sera e de domenia da les 16.00 a les 19.00 e da les 20.00 a les 23.00.

De più su La Usc stampèda de vender ai 16 de messèl.  (Monica Cigolla)