La Usc di Ladins

Tor ite i sentadins te la gestion de la roba publica, envian via na colaborazion percacenta che posse didèr a tegnir più rencurà l paìsc olache ogneun stèsc e tel medemo temp fèr crescer na sensibilità sul fat che i bens publics l’é patrimonie de duc, no roba de nesciugn. L’é chisc i prumes obietives che se à metù dant l’aministrazion de Comun de Sèn Jan, che à aproà n regolament per miorèr la gestion publica del ben comun metan en doura na »colaborazion anter i sentadins e l’aministrazion per la cura, l miorament e la gestion adum del ben comun urban, desche strument out a engaissèr i sentadins a tor pèrt a l’atività de l’Ent per arjonjer l’enteress publich e n bon endrez de l’atività publica e per valorisèr l raport democratich anter organismes lité e sentadins«.

A chesta vida ogne sentadin podarà portèr dant a l’aministrazion na proponeta che podarà ence vegnir concordèda travers na fasa de co-projetazion per ruèr a na cordanza de colaborazion, e da l’autra man ence l’aministrazion podarà ge portèr dant a la comunanza proponetes spezifiches per la gestion o l miorament de bens o enteresc comuns, domanan la desponibilità di sentadins.

La Jonta de Sèn Jan à aproà ence la linies vida che deschiaresc i ambic e la formes de colaborazion. 

Tant ti ofizes che su la piata internet del Comun de Sèn Jan se pel troèr l regolament con l’enjonta che deschiaresc i ambic e la formes de colaborazion e ence l formulèr che ogne sentadin pel scriver ite e manèr inant te Comun per ge fèr saer sia desponibilità a se tor sù un o l’auter servije, gestion o manutenzion de na picola pèrt del ben comun. L’aministrazion é a la leta per dèr maor informazions, ence al telefon al numer 0462 764758.

De più su La Usc stampèda de vender ai 16 de messèl.  (LG)