De gra a l’empegn di volontadives se pel jir a se fèr encalmèr ogne sabeda te la scoles mesènes de Sèn Jan. Ge vel se prenotèr al CUP de l'Apss.
Bona neves per l pont per i vazins te Fascia. Con doman, sabeda ai 17 de messèl, la jent pel endò jir a se fèr encalmèr te la palestra de la scoles mesènes a Sèn Jan. Dò l’alarm che aea uzà l’assessora a la sanità e dependenta de la Apss de Fascia Lucia Dellagiacoma, a chel che se aea tacà ite ence l Comun general de Fascia col procurador Giuseppe Detomas, l conseier provinzièl ladin Luca Guglielmi e i ombolc de la val, che aea palesà la dificoltà a jir inant, l’é stat troà na cordanza per fèr restèr avert l pont vazinal con la colaborazion de la Cooperazion Trentina che met a la leta l personal aministratif.
Per endèna demò de sabeda e no più dut l fin de setemèna, ma con n orarie più lonch.
»Se
aon metù dant de ruar a far 300 dosi te na giornada demò – à dit l president de la Crousc Checena de Fascia Francesco Sommavilla – enveze che 200 de sabeda e 200 de domenia descheche fajeane inant. Dapò vedaron aldò del besogn ma per endana da le indicazion che aon podessa esser assà per dut l'istà. L zenter sarà avert da le 8.30 fin le 13.00 e da le 13.30 fin le 18.00. Aon antizipà l’ora del domesdì proprio per poder far più vazins. La Cooperazion Trentina ne met a la leta l personal aministratif e noi se cruziaron de le vazinazion con i dotores e l personal, duc volontadives, de la Crousc Checena, Studafech e Socors sa mont. L’é de besogn, per na dì demò, de presciapöch 20 persone che scuerc i doi turni del da doman e del domesdì. Per endana aon concordà na giornada – à dit amò Sommavilla – percheche aon vedù che l’é n smendrament de domane de se vazinar. Noi te chisc doi mesc e mez che sion atives aon fat 4.800 dosi de vazin ma ge völ insister amò su la fascia de età anter i 50 e i 60 egn percheche somea che sie chela col più bas numer de vaziné.«
L zenter di vazins a Sèn Jan é avert no demò per i sentadins de Fascia, che coscita no cogn jir fin fora Ciavaleis, ma ence per i lurieranc che à jà fat zaolà utrò la pruma dose. Bèsta se prenotèr col CUP (Zenter Unich de Prenotazions) de l’Apss.
L’apel l’é chel de se n prevaler de chesta oportunità e de la desponbilità di volontadives che se met a la leta per fèr l vazin e se stravardèr coscita enstesc e duta la comunanza.
(Monica Cigolla)
