La Usc di Ladins

"E tu, che lurier fèste?" N’outa responer a chesta domana l’era belebon sorì: tisler, dotora, architet, maestra... per entener che che un fajea »te la vita« bastèa na parola. Anchecondì l’é più senester definir la neva profescions che vegn de dò cà, e chest ge domana ai joegn de saer se orientèr e se meter en jech, per jir encontra a n davegnir. 

Per didèr te chest percors ence i joegn fascegn, enstadì l’é stat endrezà na scomenzadiva »educante« te Cotura a Sèn Jan, l lech da pech enaudà che met ensema aministrazions e sociazions del teritorie: n confront anter la touses e i fenc che tol pèrt a »Cistà« e i referenc de Impact Hub Trentino.

Impact Hub tol ite profescionisć de desvaliva sort, l’à endrezà a Trent n lech de coworking olache vegn portà inant projec, consulenzes, formazion. Anter chisc l’é l projet »Professione Transformer« che revèrda apontin la formazion e la consulenza tel setor de la neva profescions.

Impact Hub Trentino l’é ence partner de #Fuoricentro e per chest en jebia ai 22 de messèl l’é ruà te Fascia la ‘creative director’ Dalia Macii, ensema con doi joegn che se à fat strèda te setores neves, un tel ciamp de la scritura e l’autra desche film-maker.

De più su La Usc stampèda de vender ai 30 de messèl.  (LG)