La Usc di Ladins

L projet de animazion, metù a jir per endrez del Ski Team Fassa, l’é tacà al prum de messèl e l’é jit inant enscin al 31 de aost. 

Chest an l’é stat ben 122 bec anter i 6 e i 12 egn che à tout pèrt, sot l’eie ascort de 11 animatores che i se à dat ju con gaissa e pascion per ge far passèr n bel istà, rich de esperienzes soraldut a carater sportif, descheche l’é stat pissà de fèr da vèlch an per usèr i più joegn a aer n raport san col moviment e l jech, dalonc amancol per mingol da la tecnologies.

I bec é stac empegné duc i dis dal lunesc al vender da les 9 da doman enscin a les 5 domesdì e i à podù se emprevaler del trasport endrezà coi pulmins del Ski Team.

Ence chest an se à vardà de fèr arvejinèr i bec ai sport che se pel fèr te val d’istà – à contà la responsabola Claudia Marchetti – donca roda, nodèr, tennis, atletica, jeghes de squadra, rampinèda tant en strutura che sul crep, dapodò aon fat ence pic nic e raides sa mont. Sion jic ence al PaintBall a Moena e al Biolach a Pardac.

De più su La Usc stampède de vender ai 10 de setember.  (Cristina Marchetti)