En domenia ai 19 de setember, desche ogne an te la terza domenia de setember, forin Baissiston l é stat zelebrà la festa del santuarie de la Madona di dolor.
A vidèr la zelebrazion, ensema al P. Mathieu M. Ngoa, Prior forin Baissiston dal 2016, l é ruà ence P. Giuseppe Maria Corradi, jà stat Prior forin Baissiston ti egn ’90 e dapò ence dal 2012 do da P. Lino Pacchin.
La dì de catif temp no à permetù de fèr la procescion entornvia l santuarie con la statua de la Sènta Mère di dolor e la zelebrazion é stata fata duta daite, con la sènta messa per todesch e talian a la prejenza de la compagnia di Scizeres de Aldin e a la fin la invocazions de la Via Matris, col compagnament de la sonèdes del orghen.
Desche semper ence chest an l’Union di Ladins de Fascia à chierì de arsegurèr na presenza de sie Consei, acioche la orazions posse se levèr ence per ladin tel santuarie de la trei comunanzes che ge resserva semper sia atenzion ence a nosc lengaz. La devozion di ladins per la Madona di dolor la é semper n muie viva e forta e se spera che do la limitazions sanitères ence la comunanza de Fascia posse endò jir a gejia forin Baissiston.
Endèna doman, sabeda ai 25 de setember, duc é envié al pelegrinaje ladin da d’uton da S. Giosef Freinademetz a Oies per endrez de la Union Generela di Ladins dla Dolomites. L apuntament é a S. Linert da les 14:30, da les 15:00 i pelegrins se n arloa do la Via Crucis e da les 16:00 sarà la sènta messa zelebrada dal degan Iaco Willeit.
(lg)
Onor a la Madona de Baissiston per ladin
Te la festa del Santuarie la orazions se à levà ence te nosc lengaz per endrez de l’Union di Ladins de Fascia.
Galaria retrac
View the embedded image gallery online at:
https://www.lausc.it/valedes-ladines/fascia/17183-onor-a-la-madona-de-baissiston-per-ladin#sigProId7f8e348d57
https://www.lausc.it/valedes-ladines/fascia/17183-onor-a-la-madona-de-baissiston-per-ladin#sigProId7f8e348d57