La Usc di Ladins

La valorisazion de nosc ambient, tel segnificat più lèrch de la parola, l é l conzet che vida chest an la setemèna del azet, endrezèda dai 25 de setember ai 3 de otober dal C.N.C.A, l Coordenament Nazionèl de la Comunanzes de Azet, che tol ite con ence duta la regio Trentin Sudtirol.

Te Fascia per endrez del Comun general l é stat metù ensema n program de ben 10 scomenzadives, metudes a jir con l patrozinie de la Fondazion Dolomiti UNESCO e tolan ite desvaliva realtèdes de val: scola, parochia, copratives sozièles e sociazions.

Chisc dis l é en program i ultimes apuntamenc, debant e orii a duc i sentadins :

En jebia ai 30 de setember:

-       da les 17.00 al Bar educant a Sèn Jan: prejentazion del Distret de Economia solidala de Fascia e Fiem e de la scomenzadives leèdes a la recuperazion de Maso Toffa e de Vaia Cube per endrez de la Copratives sozièles Oltre e Le Rais. Do sarà n picol marendel

-       da les 20.30 te sala grana de la Scola de Fascia a Sèn Jan: »La endesfides che met dant i mudamenc climatics e la crisa ecologica: caujes, conseguenzes e strategies che se pel meter a jir« con Elisabetta Demattio dozenta de la Scola Ladina de Fascia.

En vender al prum de otober

-       da les 16.00 al Bar educant a Sèn Jan: »Saores de noscia tera«, cercia vidèda anter i saores de noscia tera, prodoc del post e emozions ladines con l chef steila Michelin Stefano Ghetta. 

Per endrez de l’Union di Ladins de Fascia. Se tol pèrt con GREEN PASS e se pel se resservèr n post dantfora (union@ladinsdefascia.it // 0462764545), opura se podarà ite respet a l'orden de coche se rua.

En sabeda ai 2 de otober

-       da les 15.00 a les 18.00 al Bar educant a Sèn Jan: »M@sia, Mont. @nter. Storia. Identità. Ambient« scomenz del projet out ai joegn per la recalificazion urbanistica e ambientèla del scito de Masia, sora Chiusel per jir forin mont de Vich per fèr na utia sozièla, lech de enconter e de confront per duta la comunanza. 

Per endrez de la Coprativa INOUT e Pian de Joegn La Risola.  (lg)