La Usc di Ladins

L é passà trei egn da chela not di 29 de otober del 2018 canche n gran tormen de vent à dessatà bosć entriesc. Da enlouta se se n à adat amò de più de l’emportanza e de la delicateza del raport anter om e natura, per chest l é ben fat che chel event e sia conseguenzes no vegne desmentièdes.

Per se fermèr n moment e pissèr sora a che che l é stat col tormen Vaia, l’Apt de Fascia, col sostegn de l’Apt de Fiem, à endrezà na lingia de evenc per entener coche na situazion senestra posse doventèr na ocajion de mudament. »Desche Apt aon besegn de n moment de crescimonia – à dit l diretor Paolo Grigolli – ence culturèla, de chi che stèsc te Fascia e chesta l é na picola proa per jir envers chesta direzion percheche ogne miorament nasc da na inteligenza coletiva. Percheche chest teritorie apede che esser beliscim l é ence rich de idees. L é fondamentèl aldidanché pissèr sora al fat che l benesser de chisc ultimes egn l é stat de gra a na ressorsa debola e che no la é eterna, la natura de noscia valèdes. Sui temes de la neva economia turistica, de la sostegniboltà ambientèla e sozièla, de na neva relazion ater sentadins e foresć, volon orir n confront con duta la persones che te Fascia vel investir per sie davegnir e chel de si fies.«

L program del event »Vaia: l valor de la renasciuda« pont via chesta sera, jebia ai 28 de otober da les 20:30 te Comun de Pardac con na scontrèda sul bosch de Fiem con esperc del setor.

Doman, vender ai 29 de otober da les 21:00 te teater de Navalge l é l conzert del Ensemble Canticum Novum »Il Cantico della Natura«.

Sabeda ai 30 de otober da les 10:00 a les 12:30 vegn orì l Museo Ladin a Sèn Jan per veder la mostra »Travers Vaia«, da les 14:30 a les 16:00 se pel veder la sezion destachèda de L Segat a Meida e da les 16:00 a les 18:30 l Palaz de la Magnifica Comunità de Fiem olache l é stat metù fora na mostra de retrac dediché a Vaia.

En sabeda sera da les 20:30 te teater Navalge de Moena l é l confront »Vaia Lab« con tecnics e protagonisć per rejonèr de la oportunitèdes do l tormen.

 (Monica Cigolla)