La Usc di Ladins

La Sociazion Alpine Pearls met ensema lesc e paijes de la Èlpes de Tèlia, Austria, Svizra, Germania e Slovenia e da 15 egn la se dèsc ju per l svilup e la promozion del turism sostegnibol e de la mobilità doucia. Enceben la pandemia la sociazion é restèda semper ativa e si partezipanc à seghità a colaborèr per l svilup sostegnibol de sia ativitèdes. En particolèr, tras desvaliva scontrèdes con esperc del setor, l é stat envià via n confront sul besegn de condivijion de la bona prateghes anter i desvalives lesc e ence de renovèr e smaorèr la promozion di desvalives raions che fèsc pèrt de la rei. Da chiò l é nasciù l nef Pian Strategich 5.0.

De chesta rei fèsc pèrt ence l paisc de Moena e dai 15 ai 17 de otober na raprejentanza de l’Aministrazion de Comun e del setor turistich à tout pèrt a la radunanza anuèla de Alpine Pearls a Weissensee te la Carinzia. 

Moena, ti meisc passé, à tout pèrt ativamenter a n grop de lurier sul svilup strategich de la Sociazion per meter su n GECT, n grop european de cooperazion teritorièla che jirà a tor l post de la sociazion per fèr a na vida che la colaborazion anter la »perles« sie più percacenta e che se posse apede sorì ai bandi europeans per la scomenzadives sostegniboles. N troi condividù da duta la 19 Perles Alpines che da desvalives egn à tout su la strèda de la sostegniboltà travers scomenzadives green, no demò tel ciamp del turism.

De più su La Usc stampèda de vender ai 29 de otober.  (Monica Cigolla)