La Usc di Ladins

Ti ultimes egn i aane vedui a ‘La prova del cuoco’ de Antonella Clerici e a ‘Chi ha incastrato Peter Pan?’ con Paolo Bonolis e Luca Laurenti, ma, per no se fèr mencèr nia, i à tout pèrt chisc dis a la trasmiscion ‘Bake Off Italia’ de RealTime sul canal 31. Apontin, do aer balà dut istà su la paladines de noscia val per ge portèr alegrìa e tradizion a nesc ghesć, i Schuhplattler de Ciampedel i é jic a Villa Borromeo d’Adda per tor pèrt a l’otava trasmiscion del reality show. 

Bake Off l é na trasmiscion, ruèda a sia nona edizion e prejentèda da Benedetta Parodi, olache i partezipanc, conditores amatoriai, se endesfida te la preparazion de douces. I giudizi del talent l é la giornalista Clelia d’Onofrio e i conditores Damiano Carrara e Ernst Knam, ence stat venjidor del 2009 del titol talian de campion de ciocolateria.

I joegn da Ciampedel à tout pèrt a la trasmiscion jita fora en vender ai 22 de otober, olache l tem cernù l era chel del mond todesch. Te la proa creativa i conditores à cognù realisèr 100 biscoc, te la proa tecnica n Babà a la bira e te l’ultima proa cater preparazions leèdes a l’Oktoberfest.

De più su La Usc stampèda de vender ai 29 de otober.  (Nicoletta Riz)