La Usc di Ladins

Semper più de spes se sent rejonèr de passaje generazionèl ajache se se n à adat che no l é bele demò n passaje de proprietà e de consegnes da genitores a fies ma l é n prozes comples che no pel vegnir fat dal dì a la net con la sotescrizion de n at formal.

Compagnèr chest passaje a na vida ascorta, conscidran duc i aspec de chest prozes, l é la vida miora per esser segures de aer n passaje generazionèl de suzes. De spes se peissa demò ai numeres, a la spartijon de la sozietà, de la quotes, de la encèries. Dut n muie emportant, ma no ge vel se desmentièr del valor de la familia che l é n fator de gran valuta te la aziendes.

Ence te Fascia l é situazions de passaje generazionèl delicates che à de besegn de vegnir compagnèdes con i consees giusć.

Per chest l’Apt de Fascia, ensema a la Cassa Rurala Dolomites, la sezions fascènes de Asat e Unat e l Comun general de Fascia à pissà de endrezèr na lingia de scontrèdes con esperc del setor per tor dant chest argoment e per didèr la strutures alberghieres de la val che se troa a cogner ge fèr front a chesta stituazion.

Meter dant i strumenc adaté per chesta sort de transizion l é i obietives del seminarie che vegn prejentà en jebia ai 4 de november da les 17.00 a les 19.00 te sala de Consei de Comun de Sèn Jan, da Paolo Grigolli, diretor de l’Apt de Fascia, ensema a Ruggero Lucin, diretor de la Cassa Rurala Dolomites. Te chesta scontrèda se jirà sobito tel vif del argoment »Scenaries e davegnir« con Renato Donati, diretor comerzial de la Cassa Rurala e Stefano Curzio, comerzialist espert tel passaje generazionèl, te la richeza, l endrez, la pianificazion e la protezion del patrimonie. Sarà prejenc ence i responsaboi de Scouting spa, sozietà de consulenza finanziaria per la firmes picoles e mesènes, che portarà dant ejempies concrec del setor alberghier, ensema a Francesco Brunori, diretor marketing de Skopìa la sozietà de consulenza de strategies e analisa di mudamenc di scenaries.

I etres apuntamenc ai 9, 16, 23 e 30 de november del 2021.

De più su La Usc nr 42  (Monica Cigolla)