La Usc di Ladins

Fosc l’aede jà sentuda per radio, l é »Vertigine« e l é la neva cianzon de Elodie. Apontin angern, en mercol ai 3 de november, sun sia piataforma ofizièla YouTube la ciantarina, del 2016 ruèda seconda al talent ‘Amici’ de Maria De Filippi e più outes protagonista al Festival de Sanremo, l’à dat fora al publich l nef videoclip de sia cianzon, do la pruma verscion Visual, realisà tel chèder maraveous de noscia crepa spavides, più avisa sul ‘barcon’ de la Dolomites.

Te pecia ores tropes l é stat i comenc positives da man di utenc sui social tant per la ousc melodiousa de la tousa che à ressonà tel chiet de nosc ream dolomitan, ma ence per i panorames che la ciantarina à cernù per sia ejibizion.

L filmat de 3:38 moscia l panoram lunar de Sela e Pordoi olache la fegura lineara de Elodie la se conjobia con l’autezes e con i colores spavii de noscia crepa maraveouses, con noscia reina Marmolèda e dut entorn con i paesajes dolomitics. La cianzon fèsc pèrt de n chèder scempie, de na ejibizion lineara, zenza efec speziai, ma con de gran e maraveousa catedrales de sas dintornvìa. Pecià che Elodie l’abie te man n microfon e no la posse se esprimèr con duta sia naturaleza.

»Vertigine« l é n toch scrit da Elisa, Dario Faini e Davide Petrella con n stil douc e melodious, na ‘ballata moderna’. L test rejona di mudaments artistics de Elodie, che instouta la se à out a n grop de profescionisć per lurèr fora sia musega. »L é n confront uman e artistich sinzier, son do che empère a rejonèr de me enstessa tras la musega, na musega che conte de mia vijion de la vita e di sentimenc. Vertigine rejona de la dificoltà che se à con se enstesc, de coche se à de besegn de emparèr amò e dò e dò a se azetèr.«

Podede veder e aprijièr la bela cianzon »Vertigine« de Elodie a chest link: https://youtu.be/ocF0uCrtBbs.

 (Nicoletta Riz)