La Usc di Ladins

L era l an 1963 canche per endrez del Grop Ladin da Moena vegnia dat fora l prum numer del boletin »Nosha Jent«. Da beleche 60 egn donca chest codejel dut per ladin vegn metù ensema, a trac con gaissa e te etres momenc con più fadia, beleche semper con 4 numeres al an, e l ge porta a zirca 300 sozi e aboné n muie de bela piates ladines, con neves, pensieres, riflescions, poejies, jeghes e auter.
A vardèr fora duc chisc numeres se pel descorir n gran melaur de storia, de paroles, de recorc, che fèsc più rica la cultura e l lengaz de noscia val e che pel esser amò anchecondì fontana de informazions preziouses per chi che chier vèlch o i fèsc enrescides.

La consaputa del valor de chest patrimonie ciapa maor forza ogne outa che l empegn, dut de volontariat, per jir inant somea doventèr massa pesoch. 

Ence ades l é un de chisc momenc e l é ence da litèr n nef diretif: l é besegn de gaissa, de idees, de jent che se mete a la leta con convinzion arseguran de seghitèr a didèr e manèr inant l Grop e sie boletin, che podessa vegnir slarià fora de più a duc i fascegn te val e a la foresta, sorafora la seides de Moena.
L’Union di Ladins de Fascia, che pel contèr su n ofize con personal paà olache l é ence la redazion giornalistica de La Usc di Ladins, la se à jà metù a la leta per dèr na man a livel organisatif, ma la spenta e la dizijions cogn vegnir da la comunanza. 

Per chest l envit vegn uzà fora a duta la jent che à mingol de bona volontà, da Moena ma no demò, a tor pèrt a la radunanza generèla di sozi che sarà en domenia ai 7 de november da mesa les cinch domesdì (16:30) te teater del Oratorie de Moena, e ence a dèr sia desponibilità chiaman o manan n sms al numer 340 2353361 o na mail a angela.chiocchetti@gmail.com.  (Lucia Gross)