La Usc di Ladins

L é passà 3 egn da chela net maladeta che à dessatà i èlbres de noscia valèdes, mudan la parbuda del ambient e lascian tel bosch sbreghes che moscia amò segnes pesoches. Apontin ai 29 de otober i studenc che fèsc la 4^ LAF se à binà tel gran portech del Liceo artistich figuratif per dir adaut che chest nosc bosch ferì porta daite i segnes del dolor e de la mort, segnes che empon la riflescion, ma amò de più l porta ite de sé l jerf de la renasciuda, de la vita che seghita a crescer. 

L é chest che jà l an passà, tel jir stroz per chest bosch sfragelà, i studenc à vedù e troà te toc de legn resté via per bas: rames, scorc, reijes che moscèa jà la forza e la voa de renascer, che bastèa demò librèr fora con de bela idees e de picoi intervenc. 

L lurier é stat portà a compiment, e ades tel Liceo te na esposizion che à inom apontin »Rinascita«, fèsc bela parbuda la lingia de operes realisèdes dai studenc sot la vida di professores Davide Deflorian e Mariapia Desilvestro, che se pel veder ence da de fora, travers i gregn vieresc de la scola.

De più su La Usc stampèda de vender ai 5 de november.  (Lucia Gross)