La Usc di Ladins

Federico Ghetta l é da Vich, clasc 1984. Da passa 10 egn l stasc a Londra olache l à troà lurier tel setor del cinema. No l é stat sorì ma Federico no l à mai zedù e con forza de volontà l é ruà proprio olache l volea.

Federico can este jit a Londra?
Federico Ghetta: Son partì per Londra al scomenz del 2011, col classich biliet de ‘sola andata’, na valisc de 18 kg e la direzion de la ciasa olache fosse jit a star per n an. Ades l é beleche 11 egn che stae chiò. Dant ere stat per 6 meisc ence a Dublino per emparar mingol de ingleis.

Co éla che tu es jit te chela zità ingleisa?
Londra no la era te mie pians. Aee cernù Vancouver o Los Angeles desche zità per studiar e lurar ma le scole americane e canadeise le costa, soraldut per i studenc foresć. Dapò l era la costion del visto de lurier, n muie senester da ciapar. Coscita é cernù Londra. É fat mingol de enrescida e é descuert che l é na zità n muie cinematografica, tante produzion americane le śira aló ti desvalives studios.

Te aste tramudà sobito dò le scole aute?
Do aer fat Ragioneria ja Pardac aee entenzion de me scriver ite al cors de cinema al DAMS de Bologna, l ciclo de studies l era massa teorich per me e do la scola saee jà che troar lurier te chest ciamp te la Talia fossa stat n muie senester, se no empossibol. Donca chi egn son jit a lurar e me é tirà su mingol de scioldi per me paar la scola a Londra.

Che lurier faste? 
Laore tel ciamp cinematografich, me cruzie de efec visives. L titol de mie lurier l é VFX Compositor (compositor di efec visives). Son responsabol de la imagine finala che se veit sul scherm. 

De più su La Usc stampèda de vender ai 5 de november.  (Monica Cigolla)