La Usc di Ladins

No aessa nience servì ge l domanar, a la jent te sala de Oratorio de Moena, se la volea che l Grop Ladin vae inant e che l boletin Nosha Jent l seghite a vegnir publicà. La prejenza e la vejinanza desmostrada te chesta ocajion dajea da entener jà la resposta. 

En domenia ai 7 de november l Grop Ladin à chiamà ite la radunanza di sozi per dezider ensema l davegnir del grop e per l renovament del diretif.

Desche n muie de sociazion che va inant demò de gra al volontariat, ti egn l à abù auc e basc. La l’à  recordà la presidenta Angela Chiocchetti te sia relazion dijan che da n trat la gestion aministrativa é passada a l’Union di Ladins de Fascia, de chela che l grop l é na sezion, e te chest an 2021 ence la gestion de duc i abonamenc de Nosha Jent.

La presidenta à recordà ence n muie de atività portade inant, publicazion e scomenzadive fate ensema a l’Union di Ladins, al Comun de Moena, al Istitut cultural, per ge dar luster al Tinoto Monech, al Zerilo Bora e al Canori. ”Ma l Grop Ladin da Moena no l pol star en pe da sol!” l’à serà su. 

Parole de rengraziament, vejinanza e aprijiament per l gran valor del Grop Ladin é ruade da Cristina Donei, Fernando Brunel, Milva Mussner, Lara Battisti, Antone Pollam e Annalisa Zorzi che à uzà fora  l’emportanza di pionieres del Grop da Moena per tegnir su la ladinità de duta Fascia e la Ladinia e l besegn de jir inant adum, sorafora i ciampanii e de l didar, acioche no vae perdù chesta gran richeza.

De più, con i componenc del nef diretif del Grop Ladin lité endèna la radunanza, l é da poder lejer su La Usc stampèda de vender ai 12 de november.  (MCI)