La Usc di Ladins

L é na bela neva per la scolina de Sèn Jan, la Provinzia de Trent defat à deliberà l secondo stralcio di contribuc per jir inant coi lurieres de restruturazion taché de uton del 2019.

La presidenta del Ent Gestor Alessandra Cloch à dit che l é l terzo an che vegn portà dant la domana per chest secondo stralcio ma che per desvalives motives, anter chisc ence per via del tormen Vaia, la é stata sburlèda più outes. Ades zacan la delibera é ruèda e se pel jir inant coi lurieres pervedui da chesta seconda fasa, chi che revèrda l defora.

»L é stat fat n lurier de restyling dalbon emportant, con l prum obietif se sà ben de far star ben nesc bec - l’à dit la presidenta - ma ence con chela de no cogner ge meter più man per n bon pec de egn, donca se à vardà de far dut chel che l era possibol te chest stralcio.« 

Chel che sobito sauta al eie de la neva scolina, ades che l é stat tout demez i ponc, l é la doura del color, pissà per recordèr i jeghes de costruzion di bec. »Chesta l é stat na picola conquista di projetisć del studie Ghetta e Tamion da Vich – l’à jontà ite Cloch – sul projet del scomenz l era jà stat proponet i colores ma la tutela la i aea refudé. Ampò ge é stat fat osservar che l frabicat l é picol e logà te anter autres frabicac n muie gregn, l Fassa Coop, l nef Liceo, la Sorastanza, donca per se tor fora l é stat pissà de se emprevaler de chesta bela nota de color per evitar che la strutura vae a se perder. I colores ge dasc bela parbuda e i sarà ence abiné a le sezion.

De più su La Usc stampèda de vender ai 19 de november.  (Cristina Marchetti)