L archivie del Istitut Ladin l é online

Data

28 de november 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L gran lurier de schedatura, catalogazion e informatisazion é stat metù a la leta de duc.
L gran lurier sui archivies fat te chisc egn dal Istitut Cultural Ladin »majon di fascegn« l é ades online. En jebia ai 25 de november, tel chèder de la zelebrazions per i 40 egn de la biblioteca, l é stat endrezà n moment avert a la jent per fèr cognoscer miec dut l lurier ‘sconet’ che l é stat fat col material fotografich, storich e leterèr del Istitut Ladin de Sèn Jan. Material che la jent ge à donà al Istitut e che l é stat vardà fora, catalogà e informatisà tel cors di egn da n muie de persones. 

Dantfora la responsabola de la biblioteca Alberta Rossi à recordà che en chela dì l era la Giornèda Internazionèla de contra a la violenza su la femenes e l à let ju na piata del liber »Maria Piaz de Pavarin. Dal Pordoi a Katzenau«. 

La presidenta del Istitut Ladin Lara Battisti e la diretora Sabrina Rasom à metù al luster la valuta del gran lurier de duc chi che se à dat ju sun chest projet e les à volù rengrazièr la jent che à portà l material e i joegn che l à durà, à enrescì e à fat ence tesi de laurea. La diretora Rasom à uzà fora l envit a la comunanza de meter a la leta l material che l’à te cèsa e no l trèr demez percheche l posse vegnir valorisà. 

»Ti archivies l é dut material che l é stat donà – à dit la responsabola de la biblioteca Alberta Rossi – ma ence fondi, desche chel de Pare Frumenzio Ghetta, lascé aló con chela che i é al segur.«

Cesare Bernard, storich, espert e pascionà, à spiegà con gran saer e cher la valuta de chest projet. »Ti egn la jent à portà n muie de material e dachelanvia tel temp l é stat na stratificazion di documenc. N muie é stac vardé fora, schedé e cataloghé, ma n muie é amò da tor te man. Fossa lurier per tante persone percheche chest gran melaur ge vel l far ‘rejonar’ ma per far chest tant ge vel troar i spazies e meter en pe n lurier de archivistica aldò.« Trei persones en particolèr l à volù rengrazièr: l diretor da inant Fabio Chiocchetti, ideator e motor de dut l projet, e Daniele Verra e Simona Paloscia che à fat l lurier maor sui archivies.

I strumenc informatics é stac moscé dal responsabol Nicola Detomas che à spiegà tel detai coche l é nasciù l projet, la piataforma dedichèda e l gran lurier de adatament e l à envià la jent a vardèr fora l archivie online dal sit internet del ICL.

Podede lejer de più sul projet su La Usc di 3 de dezember del 2021.  (Monica Cigolla)