Ence chest an i Studafech volontères del Cianacei vel didèr i sentadins che vel tegnir viva la tradizion de aer te majon n bel èlber fornì su da festa per l Nadèl.
Per portèr inant chest bel servije per la comunanza e poder dèr fora la piantes ence chest an, ampò vardan de no danejèr l bosch, che do l tormen Vaia e ades ence a cajon del becherle l padesc dassen n muie, i à dezidù de meter semper a la leta i peces, ma de jir a i tor coltivé, te n ‘vivaio’.
I Studafech de Cianacei met a la leta piantes de trei mesures: picoles (100/120 zm.), mesènes (120/180) o granes (180/280) con n cost che va dai 15 ai 25 euro.
I èlbres vegnarà dac fora en sabeda ai 4 e ai 11 de dezember, aló da la caserma de protezion zivila de Cianacei, da doman da les nef fin les doudesc e domesdì da la does fin les cinch. Se n resta amò i sarà a leta ence en sabeda ai 18 da doman.
Per esser segures de troèr l pec de la mesura che passenea, i enteressé à da l prenotèr manan n messaje con la indicazion de la mesura domanèda al numer 345 6111083 dant dal prum de dezember.
I volontères é a la leta ence per portèr l èlber fin a cèsa de chi che à de besegn.
N èlber dai Studafech
A Cianacei l Grop di Studafech volontères dèsc fora peces coltivé per no roinèr de più l bosch che do Vaia padesc ence per l becherle, ma zenza renunzièr a noscia tradizions.
Galaria retrac
View the embedded image gallery online at:
https://www.lausc.it/valedes-ladines/fascia/17899-n-elber-dai-studafech#sigProId628f3ccced
https://www.lausc.it/valedes-ladines/fascia/17899-n-elber-dai-studafech#sigProId628f3ccced