La Usc di Ladins

L era l 1968 canche Giorgio Tribotti, che l era coi sudé a Persenon, l é ruà per n trat te Fascia. Da enlouta l é passà più che 50 egn e a chest om da le Marche ge é vegnù sot man na veia foto, che ge à recordà i bie dis passé ta Cianacei e l à fat nascer te el la voa de troèr fora chel che enlouta l era n bez, per poder l salutèr.

Per chest l segnor Tribotti à scrit a la Redazion de La Usc di ladins, domanan didament per troèr fora chi che podessa esser chest bez.

»Del 1968 ere melitare te la caserma del Genio Alpini de Persenon col grado de sergent – l ne à scrit, ben segur per talian. Entorn l meis de mé i me à tramudà, ensema con na ventina de genieres alpins, te la frazion de Dèlba, olache siane loghé te n frabicat de le Colonie Alpine Legnaghesi.

Noscia encèria l era chela de comedèr e slarièr la strèda per jir al refuge Contrin. 

Endèna che sion stac lo aon cognosciù n muie de persone che de spes ne dajea azet te sia majons con gran cher. De dì luraane do la strèda e da sera e tel fin de setemèna jiane a Cianacei.

Tel temp che sion stac ta Dèlba l era n bez che vegnia de spes a ne troèr e sion doventé peconc.

Enjonte n retrat olache son su gé ensema con chest bez, un visavì al auter, ma se ne veit de sghinz. 

Fosse curious de saer se chel bez, che ades l cognessa aer presciapech na sessantina de egn, l é amò ta Dèlba o lo entorn, per poder l saludèr, ence travers i social.«

Se zachei cognosc l bez sul retrat, domanon donca che i ne l fae saer te redazion a Sèn Jan (tel. 0462 764545 – mail fascia@lausc.it) per poder l meter en contat con l segnor Giorgio Tribotti.


 (LG)