No l é amò tempes – e speron dassen che n auter an la mude – per jir fora per la cèses con la steila a portèr la bona noela de la nasciuda del Bambin, aldò de la tradizion amò n muie sentuda te Fascia. Ence chest an i Trei Rees no se à fidà jir stroz per la majons, e ence olache l era stat metù en program de jir fora per strèdes e piazes ciantan te paisc vejin a la cripeles, a la fin dut é stat descancelà.
Ampò per no fèr morir del dut la tradizion, vèlch grop de Trei Rees se à podù l veder beleche te duc i paijes de Fascia, l dì de Pésca Tofènia domesdì, te la zelebrazion de benediscion di bec.
A Ciampede e a Cianacei, con don Mario Bravin, te chesta ocajion l é stat contà la storia di Trei Rees, omegn studié e potenc peé via da dalonc per ge jir do a na steila che anunzièa vèlch da maraveous, che no à bazilà a se pièr ju per adorèr n picol bez tanche nasciù desch l più scempie e puret sun chesta tera. I trei bec, Davide, Aaron e Ian a Cianacei, Marco, Cristian e Adam a Ciampedel, i é jic a adorèr l Bambin sun utèr e a duc i bec te gejia i ge à sport n picol don.
I Trei Rees é rué ence a Pera, Poza e Soraga.
Su La Usc stampèda di 14 de jené podede lejer de più e veder ence duc i retrac. (LG)
I Trei Rees demò te gejia
L risech sanitèr à condizionà ence la tradizion di ciantores de la steila, ma gropes de picoi e gregn à portà inant la tradizion l dì de Pèsca Tofènia ti paijes de Fascia.
Galaria retrac
View the embedded image gallery online at:
https://www.lausc.it/valedes-ladines/fascia/18268-i-trei-rees-demo-te-gejia#sigProIdf5d0358a8c
https://www.lausc.it/valedes-ladines/fascia/18268-i-trei-rees-demo-te-gejia#sigProIdf5d0358a8c