L encresciujum e la recognoscenza di enfughé rué te Fascia

Data

06 de auril 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Beleche vint persones sciampèdes da l’Ucraina é ruèdes en lunesc ai 4 de oril e les à troà azet tel frabicat de la Fuci a Poza. Do l prum moment de desorientament i enfughé à lascià che lègremes e paroles posse sbrochèr palesan sentimenc e emozions.

L era la neif en lunesc ai 4 de oril, canche entorn mesdì a Poza con n pulmin l é ruà l grop de beleche 20 persones: cater families con mères, giaves, bec e ence doi omegn. 

I vegn da l’Ucraina, dal raion entorn la capitala Kyiv e da la zità de Dnipró. Acà na setemèna i era amò al confin con la Polonia, un su per l auter ti ciampes per profugs o per strèda che i chieria la vida per se n jir. L é da aló che i é stac porté enscin a Treviso e dapò, dò aer fat l tampon e i dis de carantena, i é rué a Poza compagné da doi volontères e na tradutora. 

Giovanna Baldissera la laora en Provinzia a Trent ma chiò la é demò a fèr volontariat. La me à contà che colavia l é situzions da fèr aric e chest à spent n grop de persones a se ativèr, a chierir didamenc per enjignèr pulmins e corieres e paèr l gaselech, per poder portèr amancol femenes e bec te n post segur. 

Chest grop de volontères de bon cher che se dèsc ju te chesta azion colaboran con sociazions desche »Aiutiamoli a vivere« e autres, à troà te Fascia de etres volontères de bon cher. Coscì la families che vegn da l’Ucraina en vera à podù troèr azet a la Fuci, l frabicat metù a la leta da n privat olache de n muie i à didà per poder ge sporjer n bon stèr.

Chi che se cruzia del azet i vel ge sporjer n gran develpai a duc chi che à didà fin ades con lurier, bonamans o te autra manieres, e i fèsc a saer che no serf massaria o roba che se tegn al lonch, ma per poder proveder magnadiva frescia chi che vel didèr i pel dèr vèlch sul cont avert aposta: IBAN: IT80E 08140 05725 000004165241, causala ANA Pozza - Emergenza Ucraina. 

Podede lejer dut l articol te La Usc stampèda de vender ai 8 de oril.  (Lucia Gross)