La Usc di Ladins

En mèrtesc ai 29 de mèrz l é stat chiamà ite l Consei del Comun General de Fascia. Prum pont al orden del dì l era na mozion portèda dant dal grop de Consei Cordanza.

La Conseiera Lisanna Cincelli à let ju la mozion sotescrita da trei conseieres: ela, Cristina Donei e Giuseppe Gilli, en cont a la domana de perveder tel »Dessegn de lege de comedament del bilanz de previjion de la Provinzia de Trent per i egn 2022-2024« l test de la proponeta de lege aproà da dut l Consei a una con la mozion nr 23/2021, manèda a la Jonta de la Provinzia de Trent ai 29 de otober del 2021. Chesta proponeta de lege perveit che ge vegne dat deretorn al Comun General de Fascia l 10% de la steora de sojornanza regoeta sul teritorie per finanzièr e sostegnir la ativitèdes culturèles, l recuperament di elemenc identitères e i projec de enteres generèl che califichea sie teritorie e l’identità del popul ladin e che caraterisea l’oferta turistica de la val. 

En pratega con chesta mozion l Consei General empegna l Procurador e l Consei de Procura a ge manèr a la Jonta de la Provinzia de Trent la proponeta de lege percheche la vegne metuda ite tel dessegn de lege de assestament del bilanz de previjion. »A chesta vida – à dit la Conseiera Cincelli - la podessa vegnir aproada te n temp più curt, tegnù cont che se trata de na norma voluda da dute le istituzion che raprejenta i sentadins de Fascia«. 

Matteo Iori del grop de mendranza Fassa à dit che sie grop e nience l grop Misto no é stac contaté per condivider la mozion e che donca no se pel rejonèr de na mozion de dut l Consei. »Se astegnon da la litèr, no per l contegnù – à dit Iori – ma per coche la é stata portèda dant.«

De più, ence sui etres argoment traté tel Consei General é da poder lejer su La Usc stampèda de vender ai 8 de oril.  (Monica Cigolla)