Chisc dis se à tacà a veder stroz pien de stickers, picoi, ma dal color resa vif che se recognosc fora de anter per l stil e l dessegn: na mèscra antigas con japede la scrita »War is not Culture«, la vera no l é cultura.
Se trata de n projet de sensibilisazion e divulgazion, creà dal artist Claus Soraperra de la Zoch, n muie sensibol sun temes de atualità e de spes ence provocatorie.
»La mobilitazion, travers l slariament de stickers – scrif l artist Soraperra sun sia piata soraperraclaus.blogspot.com – vel pojèr l’atenzion su la Vera, zenza distinzion geografica, etnica, politica e sozièla. Cognon entener che demò la Cultura pel, per temp, schivèr la veres che nasc dal odie e da la prevaricazion egoistica. War is not Culture l é n projet - scrif Claus Soraperra – per sostegnir la formazion de na coscienza zivica slarièda fora, che te chesta situazion tant orenda, posse generèr te ogne un de nos prozesc de confront sozièl e azions de prevenzion.
De più su La Usc stampèda de vender ai 8 de oril.
(MCI)