La Usc di Ladins

L Comun General de Fascia tol pèrt ence chest an al projet »Curainsieme«, n percors de formazion out a recognoscer, a sostegnir e a valorisèr la manscion del caregiver che rencura n familièr de età e che no pel per se.

L projet nasc de gra a n grop de lurier metù adum da raprejentanc de la Provinzia Autonoma de Trent, di Servijes Sozièi de la Comunitèdes de Val, de la Azienda Provinzièla per i Servijes Sanitères, de la UPIPA, de la Fondazion Franco Demarchi, de Consolida e de la Consulta provinzièla per la sanità e l veit ence chest an, desche ti egn passé, la partezipazion ativa di Servijes Sozièi del Comun general de Fascia, con l endrez de scontrèdes de sensibilisazion per rejonèr de la jent che doventa semper più veia e di problemes prinzipai coleé al smaorament del besegn de cura. 

Chest an l projet se à svilupà  l perveit na pruma sera de introduzion de sensibilisazion e de informazion olache se rejona del doventèr veies e de la manscion del caregiver en mèrtesc ai 12 de oril da les 20.30 te Comun general de Fascia e n cors de formazion debant per i caregivers. 

Te la pruma radunanza vegnarà prejentà l cors de formazion per i caregivers, che se dejoujarà con scontrèdes – laboratories olache vegn fat esperienzes, co la regia de profescionisć sanitères e sozièi del teritorie. Chi che tol pèrt arà l met de se confrontèr e de proèr la bona prateghes te la gestion de l’assistenza a la persona e de proèr la formazion en prejenza, che l é na oportunità de gran valor e che stimolea, a contat coi profescionisć, opuramenter formazion on line con coleament da cèsa. 

Vegn pervedù set scontrèdes-laboratories vigni setemèna da en mèrtesc pean via dai 19 de oril. La enscinuazions al cors podarà vegnir portèdes dant endèna la pruma sera de sensibilisazion ai 12 de oril da les 20.30 te Comun general de Fascia (se pel tor pèrt con green pass de basa o l vardèr online dal link: https://bit.ly/379hbeS), opuramenter dai 15 de oril a la Fondazion Franco Demarchi Tel. 0461 273717 e – mail: barbara.noldini@fdemarchi.it. Lcors l vegn metù a jir con amancol 10 enscinué e l é a leta fin a 20 posć.  (LG)