La Usc di Ladins

La ciacia al ef viventea i paijes del Comun de Sèn Jan. Gregn e picoi se got a vardèr fora e troèr l ef dal color giust sun ogne festil e l é ence la vertola per se fèr cater vèresc e cater ciacoles con la jent de paisc. N é passa trenta, te ogne piz e cianton, i stèsc sora l’èga che cor, opura diretamenter te festil vet, i é de legn, de plastica, de papier, de peza, de rames, ogne materièl l é stat bon per fornir su i festii a Vich, Poza e Pera e sia frazions. L é cunie, eves, ponjins, gialines de ogne color e scrites con i augures de bona Pèsca, vèlch un con referimenc ence a la pèsc.

Ence chest an i Comitac Manifestazions de Vich e Poza, col suport del Comun de Sèn Jan con sia conseiera Antonella Winterle, à endrezà la ciacia al ef: te ogne festil l é sconet n ef particolèr che se cogn troèr e segnèr su la mapa endrezèda aldò per dapò la portèr te Coprativa de paisc e ciapèr n bel don. L é temp enscin ai 20 de oril. Segur na bela scomenzadiva che apede a fornir su e viventèr i paijes l à ence l merit de fèr crescer la sozialisazion anter la comunanza. 

Con na lingia de bie retrac de chisc festii, publiché su La Usc stampèda de vender ai 15 de oril, la Redazion de La Usc di Ladins de Fascia ge sporc a duc si letores i augures più bie de bona Pèsca.  (Monica Cigolla)