La Usc di Ladins

L é n organism unich, amancol te noscia val, chel pervedù dal Comun de Sèn Jan: la »Consulta dei Giovani/Consei di Joegn«. Canche l é stat la fujion anter i Comuns de Poza e Vich, defat, tel Statut del nef Comun de Sèn Jan l é stat pervedù al art. 15 ence chest istitut partezipatif, che à l obietif de tor ite i sentadins sot i 25 egn te la vita aministrativa e de i fèr doventèr pèrt ativa te la sceltes politiches e sozièles de la comunanza.

Del 2018 l é stat aproà l regolament aldò e dapò l é passà mingol de temp anter assestament del nef Comun e limitazions Covid, ma ades l’aministrazion de Sèn Jan à dezidù de ge dèr atuazion concreta a chi obietives, envian duc si sentadins anter i 16 e i 25 egn a na scontrèda per ge prejentèr l Consei di Joegn e per i envièr a tor pèrt.

L ombolt Giulio Florian, l assessor a la politiches di joegn Simone Zulian e l president del Consei de Comun Cesare Bernard à rejonà a na vida n muie franca e informala col grop di joegn che à tout su l envit a tor pèrt a chest prum enconter e che é stac envié a slarièr fora l messaje a si amisc e a si contac, de persona o sui social. L Consei pel tor ite enfin a 9 componenc e duc i joegn che à ciapà la letra i pel litèr e vegnir lité.

Chi che à ciapà la letra i à temp enscin ai 30 de oril per jir tel ofize secretariat de Comun e meter te la scatola enjignèda aposta la zedola timbrèda che i à ciapà, olache i pel scriver ite enscin a 9 inomes. Amancol n terz di inomes che i scrif i cogn esser de gener desferent e più lité farà pèrt per 3 egn del prum Consei di Joegn de Sèn Jan.

De più su La Usc stampèda de vender ai 15 de oril.



 (Lucia Gross)