La Usc di Ladins

En mèrtesc ai 19 de oril l é stat chiamà ite Consei de Comun de Soraga. N consei con n orden del dì belebon lonch, che pervedea l’aproazion del bilanz de previjion finanzièl e del Document unich de Programazion 2022-2024 (sun chest pont l ombolt Valerio Pederiva à volù rengrazièr l contabol Alessandro Mazzel per aer didà a meter ju l bilanz), del Pian de gestion de la Rei de la Resserves, del Projet per la valorisazion di troes de Fascia e del cont consuntif del ejercizie 2021 e del bilanz de previjion di Studafech de Soraga. L ombolt à fat a saer che vegn smaorà l grop di volontères che passa da 22 a 26. Amò apede l era ence doi interogazions e una mozion del grop de mendranza L Sveiarin. Una interogazion é stata portèda dant per domanèr che vegne aproà n pian per i piazai per i regolamentèr e i meter a paament e sun chest l é stat responet che dant de aproèr n pian l’aministrazion vel valutèr miec co i gestir; con la mozion enveze l é stat domanà che vegne metù fora ence la bandiera ladina ensema a la autres sun cèsa de Comun e sun chest la maoranza é stata a una.

De emportanza ence l pont che pervedea che l Comun de Soraga ge dae su al Comun General de Fascia la funzions en cont di servijes sozioeducatives per la neva coa di bec.


Complimenc al campion Federico Fontana
Dant de tachèr ite la sentèda l ombolt Pederiva à volù ge fèr i complimenc da man de duta l’aministrazion al joen Federico Fontana per si meric sportives vadagné endèna chesta sajon da d’invern, con la consegna de na targa. Federico, ai 23 de mèrz passé, sul Abetone l à vent i Campionac nazionèi de schi, l se à vadagnà la medaa de or tel slalom strent Under 16 e l titol de campion talian. Federico l é scrit ite a la sozietà sportiva Monti Pallidi e l fèsc l Ski College de Fascia. A el ge é jit n fort batiman coi complimenc da man de duc i conseieres e l publich te sala.  (Monica Cigolla)