La Usc di Ladins

De solit i Studafech de Fascia i festeja desche sia Patrona Sènta Bèrbola, ai 4 de dezember. Ampò ence Sèn Florian, sul calandèr ai 4 de mé, l vèrda via dal fech e l stèsc sora ai pompieres volontères. L é festejà dai studafech tel raion todesch e tel Sudtirol e l é ence l Sènt Patron de Cianacei.

Per chest l nef Ispetor del Distret di Studafech de Fascia Alessandro Pellegrin, ensema col  Capofrazion de Cianacei stat Ispetor per passa 20 egn, Rinaldo Debertol, se à pissà che l era l moment giust per meter ensema la doi robes e endrezèr n convegn di Studafech, do doi egn de stentes. 

Gregn e picoi Studafech de dut l Distret de Fascia, che va da Cianacei a Soraga, se à binà en sabeda ai 30 de oril domesdì dedant a la gejia del Sacro Cher olache don Mario Bravin, che l é ence Vizeispetor di Studafech de Fascia, l à zelebrà na bela messa rejonan de pascion e volontà de chi che se met a la leta per la comunanza.

Do messa, enceben che l temp no aesse proprio didà, duc i omegn e i mesi i à passà fora con na longia defilèda l paisc fin te Pian de Parèda, olache l é stat endrezà l convegn, prejentà da Rinaldo Debertol.

Do i intervenc del ombolt Giovanni Bernard, del Ispetor Alessandro Pellegrin e del president de la Federazion di Studafech del Trentin Giancarlo Pederiva se à podù veder la manobres de joegn e gregn studafech, con gregn batiman del publich.

De più su La Usc stampèda de vender ai 6 de mé.  (Lucia Gross)