La Usc di Ladins

Con la bela sajon cresc la voa de stèr defora e coscita ence chela de se goder con jeghes e ativitèdes a l’averta. L grop de jocolieres de Fascia l é da n trat che l fèsc sauc e pirles e jeghes con balotes e cerchies per se arcedèr e se goder en compagnia, ma soraldut per se enjignèr per i neves spetacoi de chest istà. L é jà passà 4 egn da canche i jocolieres de Circensema, grop coordenà da Thomas Zulian e dai jomelins Martin e Thomas Pederiva, aea abù l’idea de portèr dant na sègra acrobatica ti lesc più da encant de noscia val. Da enlouta l grop l é cresciù de grazia ence ai contac e a la colaborazions coi miores jocolieres a livel nazional e chest grop de joegn se à miorà semper de più te sia acrobazies. 
L Circen Dolomites Festival l é n event che vel meter al luster jocolieres e acrobazies da marevea ma ence la vedudes e i panorames de nesc monc e ence chest istà 2022 sarà da se spetèr n event rich de legreza e colores.
Endèna l grop se à pissà a na ‘Antepruma Festival’ per poder ge sporjer la marevees del circo ence a chi che no pel les veder ti meisc da d’istà.
L apuntament é per en sabeda ai 14 de mé te la bela vila de Tamion con laboratories de jocoleria e proes de balanzament per picoi e gregn fora per strèda.

De più su La Usc stampèda de vender ai 6 de mé.


 (Monica Cigolla)