La Usc di Ladins

La Comiscion Europeèna à dezidù de nominèr l an 2022 desche ‘L an european de la joentù’, col ge dedichèr ai joegn programes, strategies e evenc. Te chest chèder i enc locai jia n ruol dassen emportant per sostegnir la partezipazion ativa de la joentù percheche la dovente protagonista del mudament. Ence l Consorzie BIM del Adesc à dezidù de renovèr sie empegn a favor de la comunità col envièr via per l an 2022 n projet dal titol ‘L’èga e i joegn’ con l obietif de valorisèr la ressorsa de l’èga e de sensibilisèr la comunità sui temes de la sostegnibilità ambientèla.

De chest projet fèsc pèrt doi scomenzadives: ‘L’èga te la storia’ n percors didatich per i studenc de la scoles mesènes per pissèr sora al tem de la ressorsa idrica e de sia doura te la storia e l concors fotografich dal titol ‘Èga trentina: sostegnibilità a 360 gradi’ che vel engaissèr i joegn anter i 14 e i 25 egn a cognoscer l teritorie olache i vif, con atenzion particolèra a la ressorsa de l’èga.

Con chest concors vegn envià i joegn a manèr ite sia fotografies su l’èga, i retrac cogn vegnir touc ju sul tegnir de la Provinzia de Trent e i pel aer desche tem: l’èga desche beleza naturèla; èga e sostegnibilità ambientèla; èga e energia; èga e storia. Ogne concorent pel tor pèrt con n retrat per ogne tem.
La Comiscion metarà ju na graduatoria di miores retrac per ogne categoria e la nominarà cater venjidores. Vegnarà valutà la creatività e l’originalità del retrat, se l passenea col tem del oget, la calità e la capazità de comunicazion. L concors se serarà su con n event de premiazion e la realisazion de na mostra con la pruma diesc fotografies classifichèdes per ogne categoria.

I retrac cogn vegnir mané ite dant dai 31 de messèl del 2022 a info@pec.bimtrento.it. Per aer maor informazions sul concors se pel desćiarièr l regolament dal sito www.bimtrento.it.  (MCI)