La Usc di Ladins

L é stat slarià fora chesta setemèna adertura doi neves apuntamenc con ‘Saeres. Tutorials de tradizions e mestieres fascegn’. Descheche ve aon jà tropa outes contà l é na lingia de curc filmac che à desche zil l tegnir vives la particolaritèdes de noscia cultura e la vita da vigni dì.

L prum l é stat realisà con Gigio Iori de Berghin da Dèlba e con el ve rejonon de coche n’outa se jia a fegn: bater la fauc te doi desvaliva vides (con la batadoa o con la piantela e l martel), seèr tant sul adort che sul pian e dapò restelèr e portèr l fegn te tobià.

N secont filmat l é con Fonjo Weiss de Coz da Larcioné, che con na bona man da artejan moscia co fèr n restel da fegn, da na brea ruèr a n tor fora n èrt da poder durèr per sacotenc de egn.

Apede a ogne tutorial aon enjignà n volantin de compagnament, na sort de vademecum, che spiega zeche de più en cont al Saer portà dant. I filmat i é stac realisé con Filmart Television e i é da troèr sul canal YouTube de TV Ladina, te la playlist resservèda.

De più su La Usc stampèda de vender prum de messèl.  (Nicoletta Riz)