L é ruà a sia 40^ edizion l picol marcià de benefizenza del grop Mille Centrini da Vich. L era l 1981 canche, per endrez de Christine Gögele Fontana, 7 o 8 femene da Vich se à troà e le se à pissà de enjignar n picol marcià de benefizenza per didar fora l Comitat per l monument ai sudé morc en vera. Le se à metù con gaissa a cojir, far maia, lurar con l acherle, coscì da la Madona de Aost del 1982 l é stat avert l prum marcià e dut l vadagn é stat durà per l monument logà jun cortina apede la Pieif de Sèn Jan.
Vedù l bon ejit de chela pruma scomenzadiva l é stat dezidù de jir inant e ti egn l grop l é ruà a tor ite adertura 35 femene e 12 omegn che didaa a endrezar i lurieres e i picoi marcé.
Chest an l marcià, che à permetù de portar inant n muie de azion de didament, l festejea apontin 40 egn torogn e Christine Gögele Fontana l é semper restà per duc chisc egn l motor e l temon del grop.
»Ades sion restade de na dejina – disc Christine – e speron semper che vegne ite valch joena o joen percheche saer cojir o recamar oramai l é competenze che va fora, no ge volessa che le vae a se perder.
I lurieres che fasc i Mille Centrini i é da marevea, i conta de ore e ore de empegn de cheste femene che da n scur al auter recama, couc, met ensema e le crea valch de spezial.
L picol marcià vegn avert ence chisc dis: ai 6, 7 e 8, ai 13, 14 e 15 e amò ai 20, 21 e 22 de aost te la senta de la sociazion, te la sala a pe pian de Ciasa Marmolada, da le 14.30 a le 18.30.
De più su La Usc stampèda de vender ai 5 de aost. (Monica Cigolla)
40 egn de benefizenza
L picol marcià del grop Mille Centrini da Vich l é ruà a n bel cedean toron. Chisc dis che vegn i lurieres fac a man vegn metui fora te Ciasa Marmolada.
Galaria retrac
View the embedded image gallery online at:
https://www.lausc.it/valedes-ladines/fascia/20474-40-egn-de-benefizenza#sigProIda5fc4568ef
https://www.lausc.it/valedes-ladines/fascia/20474-40-egn-de-benefizenza#sigProIda5fc4568ef