La Usc di Ladins

L projet perveit cater scontrèdes, olache i bec pel scutèr conties e letures animèdes da la ousc de volontadives. Te la pruma scontrèda, metuda a jir tel parch di jeghes de Cianacei, a ge lejer su ai 28 bec scric ite l é stat Milena Fosco e Prisca Castlunger, doi volontères anter dutes cheles e chi che chest’aisciuda aea tout pèrt al cors de letura espressiva endrezà da Daniele Verra per la Biblioteca, apontin per meter adum n grop de persones che posse esser a la leta a roda per evenc de chesta sort.
Per fenir su la scontrèda l é stat n moment algegher e golous, coi douces enjigné da la Coprativa sozièla Oltre de Ciampedel.
L program jirà inant en jebia ai 11 de aost, ai 25 e e dapò amò ai 8 de setember. Per tor pèrt ge vel se enscinuèr per l mèrtesc dant a la Biblioteca te strèda Dolomites 179, tel. e whatsapp 0462 602382, mail: biblioteca@comune.conazei.tn.it, coscì se pel ence aer duta la informazions.

De più su La Usc stampèda de vender ai 5 de aost.  (LG)