La Usc di Ladins

Ge jir do ai ensomesc, se tor l temp de se fermèr e trèr l fià, e troèr te la letura vèlch che pel ne salvèr. Chisc l é demò na pèrt di messajes che Sonia Tabai, na femena da Mantova che à cernù Fascia, e più avisa n picol bait sun Soracrepa, desche sie lech del cher, vel portèr dant te sie terzo liber, dal titol »La ragazza di Monteluna«.

N liber che é stat prejentà en vender ai 29 de messèl te sala del Consei de Comun de Cianacei per endrez de la Biblioteca vidèda da Daniele Verra, che à tout su chesta proponeta apontin percheche chest scrit l é leà a noscia tera.

»La ragazza di Monteluna« descheche de spes sozet ti romans, met adum elemenc autobiografics e etres de fantasia e l se dejouc travers la storia forta de Deva e Andrea, i doi protagonisć che troa la strèda per ge fèr front ai momenc scures de la vita travers la scritura. Chela scritura che deida a se librèr e a ge dèr ales per sgolèr en aut a chel che podessa restèr demò n dolor daite per n padiment vivù, e a troèr la forza per scomenzèr da nef.

De più su La Usc stampèda de vender ai 5 de aost.  (Lucia Gross)