La Usc di Ladins

Dant la paroles e dapò i fac ne à metù tedant ai eies bel chièr chisc dis passé che nosc pianet l é do che l ciga aiut, che i evenc estremes caujé dal mudament climatich i sozedarà semper più da spes.

La paroles l é stat cheles del meteorologh e climatologh Luca Mercalli, ghest de la rassegna Campo Base en jebia ai 4 de aost. I fac l é stat chi sozedui l dì do, en veder ai 5 de aost con la nigola che se à crepà, la gran pievia duta conzentrèda te pech temp che à caujà smolinamenc e gregn dans tel raion da Vich a Ciampedel.
Te piaz Marconi a Cianacei, tedant a n gran publich, do l salut del ombolt Giovanni Bernard che ge à resservà n pensier a chi che à perdù la vita e ai parenc de la vitimes de la Marmolèda, l espert de giacees l é stat domanà fora da Elisa Salvi e Giorgio Pedron e l à tocià desvalives argomenc de peis. 

Prum de dut belapontin chel de la Marmolèda. »No aon nesciun element per dir che l destach de neif, giacia e crepa dai 3 de messèl se aessa podù l perveder – l à dit bel chièr. L é stat n episodie che à metù ensema na lingia de casualitèdes, ence gé fosse restà sotite, enceben che sie n glaciologh. La Marmolèda l é n giacé che l é do che l se desfanta, jà col scomenz di egn ’80 l à tacà a se deslabeèr. N muie l é la caujes: n invern con pecia neif, l zero termich a 4.000 metres de auteza, l tempram ciaut fora dal normal. Duc i giacees de la Èlpes i é do che i padesc, i pert presciapech 1 metro de spessor ogne an - à spiegà Mercalli - ti egn più ciauc desche del 2003 i à perdù 3 metres, del 2022 pisson che i n perdarà adertura 4 metres.

De più su La Usc stampèda de vender ai 12 de aost.  (Monica Cigolla)