La Usc di Ladins

L era jà da n trat che i sentadins domanèa de aer maor informazions. En jebia ai 8, dant da la scontrèda de prejentazion de la Provinzia, tel piaz de Sèn Jan l é stat metù a jir n ‘flash mob’ olache vèlch joen à portà material informatif per ge deschiarir a duc i enteressé i intervenc pervedui  dal projet BRT.

L grop de sentadins de noscia valèdes se à palesà n muie critich su la proponeta soraldut per l consum de teritorie. L conzet era stat palesà a na vida n muie chièra ence da na instalazion con 2 gregn crofegn fac de legn, taé fora per mez e embotii con na gran zopa de tera e erba e sunsora n bachet co la bandierina e l scrit BRT, vedù desche n ‘mostro chegapeton’, che se magna nesc pre te n soul bocon!

L é vera che se trata de n projet provinzièl – l é stat dit – ma i sentadins se spetassa che nesc aministradores de val i tole ite de più sia jent, i ge porte dant la costions inant che sie dut dezidù, ence travers scontrèdes publiches olache la jent aesse l temp e l met de entener delvers, fèr domanes e aer respostes. I aministradores de nesc comuns l é nesc prumes referenc, e i à ence l doer de meter en consaputa si sentadins.

En cont de chest se à ativà l’aministrazion de Moena, che en lunesc ai 19 de setember da mesa les nef da sera l’à endrezà na scontrèda te sala grana de la scoles per rejonèr con si sentadins de che e co che podessa mudèr la mobilità sul tegnir de sie comun.

 (Lucia Gross)