N gran braciacol anter fascegn e ucrains

Data

25 de setember 2022

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
A Poza l é stat endrezà n bel moment de festa co la families ucraines de Ciasa Fuci e i volontères che te desvaliva manieres à sostegnù l projet de acolienza de Giorgio e Miriam.


L era presciapech cent persones en domenia ai 18 de setember a Ciasa Fuci per tor pèrt a la marena che, se fossa stat più ciaut, la fossa stata endrezèda su la teraza, ma l tempram mudà ti ultimes dis à conseà de tramudèr daite. 

Na trentina l era femenes e bec ucrains che, oramai da passa 5 meisc, à troà azet te la strutura vejin al portoi de Aloch, i etres l era volon­tères, colaboradores o sponsor che, te desvaliva manieres, à didà a realisèr chest bel projet de acolienza. 

La festa voluda dai patrons de la strutura, Miriam e Giorgio Deluca, l é stat dalbon n bel moment de integrazion, a scomenzèr da la ma­gnadiva, ajache chela da chiò entorn se à enterzà con n muie de piac che la femenes ucraines à enjignà per ge fèr cognoscer a duc i saores di sia tera e ge palesèr a chesta vida l ‘diakuiu’, l develpai de cher a chi che te chisc meisc ge à dat na cèsa, n let ciaut e n muie de auter. 

Sui desć fajea bela parbuda i ‘golubzi’, picoi fagoc de ris, cèrn majenèda e verdura, fac ite te foes de versa broèdes dantfora e dapò fac chejer pian pian: l piat tipich ucrain che no pel mencèr da la festa granes. E dapò i ‘varenyki’ na sort de ciajoncie con ite piré de pomes de tera e fonghes sec, concé con smauz e cigola, e amò i ‘pirozhki’, na sort de krafen salé con ite capusc, e pomes chec te forn con sos de persemol e ai. Per no dir dapò di douces: ‘blinciki’, rodoi de amelec con ciocolata o con poina e ueta, ‘vozduscne pirozheno’, na sort de meringhes, e amò ‘bulochki’, n bon pan douc, e tortes con brama e fruc... dalbon na marevea per i eies e per la bocia. 

A la fin de la marena l é stat l moment de maor emozion, chel di rengraziamenc...

Podede lejer dut su La Usc stampèda de vender ai 23 de setember.  (Lucia Gross)