La Usc di Ladins

Bèsta pech per se sentir pèrt de na comunanza e soraldut bèsta pech per se dir develpai. Bèsta demò na parola. Na parola che é vegnuda dal cher, enstadì, en ocajion de la Festa del Rengraziament de l’Union di Ladins de Fascia. L develpai più gran e dal cher ge é jit ai gropes de Socors da mont, a duc i omegn e la femenes che fora per dut l an é semper a la leta per portèr socors a chi che se troa tel pericol sun noscia crepes. A ic e eles, develpai.

Dapò ben segur a duc chi che à didà, se à metù a la leta, tel picol e tel gran: a don Mario Bravin, al Cor de gejia e i letores percheche l ladin à ressonà bel e adaut te la liturgia; al Club Pietrone per la bona marena e l servije ezelent; a la Musega da Poza e duc i gropes de folclor e de volontariat che con sia prejenza à viventà la festa; al grop de joegn de Ciampedel e Cianacei per sie contribut; a duta l’autoritèdes che à palesà sia vejinanza: a la firmes che à dat sie sostegn. E ben segur a duc chi che tel acort o te sie picol à pissà, lurà, metù cef e mans per l endrez e per l bon ejit.

La Festa del Rengraziament de l’Union di Ladins é tachèda ite con la defilèda che é pontèda via da Piaz de Ciampedel per compagnèr la jent sun gejia. Chiò te na bela messa per ladin don Mario à uzà fora i valores del volontariat, de chi che fèsc la robes zenza se englorièr e zenza presunzion, descheche ne disc ence l Vangele do Sèn Luca. »L Segnoredio ne à ensegnà a preèr per nos, no per me« à dit don Mario. Sun utèr tel ofertorie l é stat portà ence i èrc di volontères del Socors e l é stat preà percheche l Segnoredio li vèrde via, che i posse portèr inant sie servije semper en segureza.

De più su La Usc stampèda de vender ai 28 de otober.   (Monica Cigolla)