L é stat na zelebrazion liturgica rica de emozion chela de en domenia ai 30 de otober te gejia de Soraga. Le comunanze parochiale de Mazin, Pera, Poza, Vich e Soraga se à binà te la messa grana per saludar padre Giovanni Rossi del Baila che chisc dis lascia Fascia per jir a portar sie minister da preve te la Comunità Dehoniana, sie Istitut religious, te le parochie de Vilazan e Povo.
Padre Giovanni era vegnù deretorn da l’Argentina acà cater egn, na scelta fata per rejon de età, l é del 1933, ma ence de sanità. Te chest temp l à stat te sia ciasa fora Roisc e l à didà don Andrea Malfatti te l’atività parochiala.
Bele da pech l é ruà la neva che l é stat chiamà da la Comunità Dehoniana a jir a Vilazan e per chest soe parochie à volù l strenjer te n fort braciacol per l rengraziar per chel che l à fat e l compagnar te soa neva miscion.
La messa grana é stata zelebrada da padre Giovanni ensema a don Andrea, don Erminio, don Luciano, padre Kretienne e l diacon Antonio e la é stata viventada da le bele ciantie de la Corala Sènc Piere e Paul. Te la pardicia don Andrea ge à dit de bele parole. »Voi te rengraziar per to servije te chisc 4 egn e per toa amicizia e stima sacerdotala, tu es stat per duc veicol de la parola evangelica segura de Gejù. Ogne cambiament enlumenà dal Spirit Sènt, l é semper ocajion de crescimonia te la fe e te l’acolienza del Segnoredio. Develpai padre Giovanni, l Segnor te rende merit e te augure dut l ben.«
De più su La Usc stampèda de vender ai 4 de november. (Monica Cigolla)
Padre Giovanni del Baila lascia le parochie de Fascia
L é stat chiamà a portar sie minister a Vilazan e Povo. La comunanza ge à sport l develpai per so servije prezious.
Galaria retrac
View the embedded image gallery online at:
https://www.lausc.it/valedes-ladines/fascia/21497-padre-giovanni-del-baila-lascia-le-parochie-de-fascia#sigProId7ed5c4af2a
https://www.lausc.it/valedes-ladines/fascia/21497-padre-giovanni-del-baila-lascia-le-parochie-de-fascia#sigProId7ed5c4af2a