La Usc di Ladins

L é na ocajion de confront con la comunanza scientifica e con duc i enteressé a la costion de l’educazion te doi o te più lengac, chela che la Scola Ladina de Fascia vel sporjer, pean via da la analisa di ejic de na enrescida che à tout ite la scolines provnzièles ladines de Cianacei e Pera: na enrescida che vèrda ai desvalives aspec de la comunicazion e di comportamenc verbai e no verbai, al fenomen de la migrazions, a la mediazion e a n muie de auter.

Dut é peà via da n projet che à tout ite l professor Michele Daloiso, professor sozià de didatica di lengac modergn te l’Università de Parma, che l é a cef del Grop de Enrescida ELICom (Educazion Linguistica Inclusiva e Comunicazion) en partnership col Centro Studi Erickson.
I ejic de la enrescida é stac publiché chest an tel liber »L’educazione bilingue in età prescolare. Una ricerca sulla Scuola Ladina di Fassa«, per la edizions Erickson. 
L confront avert a la comunanza de Fascia sui ejic de la enrescida vegn endrezà con na scontrèda online tras la piataforma Google Meet en mèrtesc ai 29 de november da les 16:30 e per tor pèrt ge vel se scriver ite dant dai 24 de november dal link: https://forms.gle/3BTik3iDQovFMFB56.

De più su La Usc stampèda de vender ai 18 de november.  (LG)