L 2022 caraterisà per la Majon di Fascegn da na neva parbuda

Data

08 de jené 2023

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Tel an giusta fenì l Istitut Cultural Ladin à prejentà n nef logo e l renovament de la parbuda istituzionèla. Va inant l projet »Do l vièl del saer« coi recorc de Lis dal Vera.






L’atività de la Majon di Fascegn porta inant tel an 2022 l projet »Do l vièl del saer«. Per endrez de la Biblioteca ai 11 e ai 13 de firé vegn portà dant amò doi outes l spetacol de teater sun Père Frumenzio Ghetta de Martin che é stat adatà a la paladina. Te chesta ocajion vegn prejentà ence l prum numer de na neva regoeta editorièla dal titol »Jent de Fascia« dedicà apontin a Père Frumenzio Ghetta.

Endèna via per dut l an taca a moscèr si fruc l rebranding, l renova­ment de la parbuda istituzionèla. L Istitut Ladin prejenta sie nef logo, na M che moscia doi fegures che se dèsc la man, che recorda la forza del dialogh e de la condivijion. Sul troi del nef logo e de la neva parbuda la Majon di Fascegn endreza duta na lingia de ativitèdes: video, banner, colaborazions col teritorie. 

De otober enveze, te la bela cornisc del Vera, la compagnia »Trei carc de ora« met dant la raprejentazion »Do l vièl del saer – Lis dal Vera vel te dir vèlch« su la vita e i recorc de Lis dal Vera, na femena simbol de duta la femenes da zacan, ejempie de struscies e de fadies.

Se pel lejer de più su l'atività fata dal ICL fora per l an 2022 su La Usc stampèda di 5 de jené. 

Endèna, desche per Père Frumenzio, ence per la Lis dal Vera l spetacol de Ilaria Chiocchetti é stat  adatà a la paladina e l vegnarà amò portà dant. L apuntament l é per i 14 e i 15 de jené che vegn: ai 14 tel Chino de Cianacei, ai 15 te La Gran Ciasa a Soraga, semper da les 20:30, e ti doi apuntamenc vegnarà prejentà ence l secondo numer de la regoeta editorièla »Jent de Fascia« dedicà apontin a la Lis dal Vera.