L é mort Fratel Biagio

Data

13 de jené 2023

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Del 2017 l aane scontrà ence te Fascia, l jia a pe fora per duta la Tèlia. L se à dat ju fin tinultima per i ultimes.

En jebia ai 12 de jené se à destudà Fratel Biagio Conte de 59 egn, l miscionar laich che era malà da temp de tumor. L é se n jit te la infermeria de la ‘Miscion de Speranza e Ciarità’ de Palermo, un di lesc più senestres de la zità. Con el l era si compagnes de viac più fidei, chi che el ge dijea ‘mi frèdes ultimes’, chi che el aea dezidù de rencurèr, canche l à cernù chesta strèda per didèr fora i purec. Do l prum pelegrinaje a Assisi del 1990, na sera l é passà tedant a la stazion de Palermo, l à vedù jent che dormia al freit. L é jit deretorn a cèsa, l à tout na thermos, n Vangele, n sach da dormir e l é jit aló con ic. A si genitores l ge à dit demò: »Ades sé che che l vel da me l Segnoredio« E del 1993 l à metù su la Miscion per i purec. Da enlouta l se à semper dedicà a so projet de solidarietà per i ultimes e no l se à mai tirà endò, l à fat ence protestes e jajuns.

La neva de sia mort é ruèda dutintorn. Ence te Fascia olache Fratel Biagio é ruà del 2017 compagnà da Fratel Davide. I aee troé a Soraga, i se aea fermà a dir su na orazion tedant al Crist te piaz Bepo Roch e l aea volù saer che che l era scrit per fascian. En chel an l era jit a pe fora per duta la Tèlia per portèr i messajes de speranza e de pèsc con na gran crousc su la schena, la Crousc de la Speranza.

Enlouta l me aea contà che i era ponté demez da la Sizilia, a Roma i aea ciapà la benediscion del Papa, i era jic ti posć di teremoté, te le Marche per ge dèr confort a la jent che aea perdù jent e cèsa, a Mirandola e tel Vajont. »Volon ge portèr n messaje de speranza e de pèsc a la jent, con na parola de confort, de coraje te chest moment senester. Aon sentù chesta chiamèda e sion ponté demez – l aea dit. Ogne dì fajon presciapech 20/25 chilometres. Jon sun stradon percheche volon scontrèr la jent, ge dèr speranza. Gio ge vèrde tel mus a duc, ence ai joegn e ge die che ic l’é la speranza del mond, ic ge creit. Preon per duc i popui, no se cogn meter su mures, ma fèr su ponc descheche disc ence Papa Francesch. I vel tor demez la Crousc, i la ofen, gio me la tole do, no la lasce mai.«

Fratel Biagio l aea na bona parola per duc, i turisć se fermèa e i ge fejea foto. Ge aea domanà se i aea troà da dormir. »Ansera eraane sun Sèn Pelegrin e sion vegnui ju e ju, per 14 chilometres zenza troèr n post olà se fermèr. Sion rué ló da la gejia de Sèn Vile e la era serèda. Per fortuna che aon troà na familia del Kosovo, Fadil e so fi Erik che ne à avert i ujes e ne à dat n post per dormir.«

Enlouta, l era al scomenz de messèl del 2017, Fratel Biagio e Fratel Davide se aea enarloà bel pian pian envers Vich, i era jic fora per Mont de Vich e ju jun Busan, do sie viac de la Speranza.

Messajes de comozion per la mort de Fratel Biagio é rué ence dal president de la Republica Sergio Mattarella: »L era pont de referiment, no demò a Palermo, per chi che cree ti valores de la solidarietà e de la degnità de la persona, che el l à testimonià coi fac.«

L obito sarà te la Catedrala de Palermo en mèrtesc ai 17 de jené. L ombolt Roberto Lagalla à proclamà manconia de duta la zità fin al dì de la sepoltura.

 (Monica Cigolla)