La Usc di Ladins

L temp de Pèsca Tofènia l é rich de tradizions, olache la religion e la fe se mesceida con cherdenzes magiches antiches de evenc soranaturèi e ric veiores che segna chel moment, dit de la Dodejeisema net, leà al solstizie da d’invern e che rua apontin 12 dis do l Nadèl. 

La tradizions che amò anchecondì vegn portèdes inant, amancol en pèrt, l é soraldut cheles che la Gejia à tout su, fat sie e mudà per les leèr a la religion catolica e a la fe. De autres les resta oramai demò ti libres o te la conties, desche chela de la besties che en vea de Pèsca Tofènia les se rejona: na cherdenza no demò ladina, ajache se pel la troèr te duta la Èlpes, tel nord e ence ju per la Tèlia enscin te la Calabria. Te Fascia la é stata documentèda da Simon de Giulio tel liber Usanzes e lurgeres da zacan, dat fora dal Istitut Cultural Ladin amò del 1983. L é stat anter la pruma publicazions del ICL, fata apontin per tegnir su la memoria de n passà che se no fossa jit destrabonì.

Aló Simon Soraperra l conta percheche in vea de Pèsca Tofènia »i no jia nience più a dèr na vegèda del bistian jun stala, inant de jir a dormir.«

Oramai i é ben pec chi che jissa te stala, ajache apede la majons de Fascia stales no n é più, e nience tobié, ma l rit de sciumentèr ogne stua e cambra l à endò ciapà mingol pe da canche te la parochies de noscia val i à tacà a dèr fora l incens, ensema con n sfoi che ge recorda o ge disc, a noscia jent e ai foresć, de la tradizion de jir te ogne cianton de la cèsa a sciumentèr per parèr demez i spiric catives e domanèr la protezion del Segnoredie, dant de scriver i segnes col śes sun sèva de usc.

 (Lucia Gross)