La Usc di Ladins

»Pèsca Tofènia, torta e liènia, vin e stopin a mi e a mi vejin«. Coscita i dijea nesc veges al vegnir la festa de Pèsca Tofènia ai 6 de jené. I se augurèa coscita che sibie in cèsa bon da magnèr, un goc de vin da beiver e chel tant da se fèr lum. Chest tant i ge l augurèa ence ai vejins. 

Coscita ne conta Simon de Giulio de la veiora usanzes en vea de Pèsca Tofènia. Usanzes che, per gran pèrt, tel temp é jites perdudes e che l é stat bel reviver endodanef enstadì, en vea de Pèsca Tofènia, te Museo Ladin. N moment particolèr che l staff del Museo à pissà e endrezà per menèr sentadins e ghesć fora per la sales ma ence fora per l temp, del passà e del prejent, percheche chi che lo vif e lo cognosc i posse l portèr inant ence tel davegnir.

Passa 40 persones à tout su l envit de jir te Museo olache la responsabola Daniela Brovadan à spiegà i ric e i misteres de la vea de Pèsca Tofènia. A orir la strèda e compagnèr la jent l é stat l grop de Trei Rees e pèstres da Poza che do aer ciantà e sciumentà la sala a pe pian del Museo (per via del fum se à tacà ite ence l alarm) i é jic su per aut a sciumentèr duta la sales descheche vegnia fat n’outa.

De più su La Usc stampèda de vender ai 13 de jené.  (Monica Cigolla)