La Usc di Ladins

Desche da tradizion, ence chest an la Corala Sènc Piere e Paul da Soraga à portà dant en mercol ai 3 de jené te gejia parochiala l Conzert da Nadèl. I corisć dintorn utèr, vidé dal joen maester Michele Pellegrin e compagné al orghen da la maestra Svitlana Kozynska, à menà i spetatores te la doucia atmosfera del Nadèl con n repertorie che à soscedà pèsc e armonia.

La Corala porta inant la tradizion veiora di ciantores de Soraga, descheche l é documentà dai veies libres de antifonaries e cianties religiouses populères del 1865, scric a man dai ciantores e doné a la Parochia de Soraga. Apede che a compagnèr la zelebrazions religiouses l grop porta dant ence conzerc desche chel belapontin da Nadèl te gejia e sot la festes ence te la Cèsa de Paussa de Fascia per ge portèr mingol de legreza ai utenc e a si familières.

De più su La Usc stampèda de vender ai 13 de jené.  (Monica Cigolla)