La Usc di Ladins

L era l an 1963 canche vegnia fora l prum numer de »Nosha Jent« l boletin del Grop Ladin da Moena. L Grop aea tacà a se meter ensema del 1962 con chela de tegnir vif e svilupèr l lengaz moenat, e l prum obietif che i se aea metù dant l era stat de enjignèr n foliet periodich. 
Enlouta no l era sorì desche ades, ge volea meter ensema i scric, enjignèr la maerisc per dapò fèr i sfoes ciclostilé e i manèr fora per posta, metan ence de persona i scioldi che servia per dut chest.
Da Nadèl del 1963 vegnia fora l prum numer, n »numer unich« olache l Grop Ladin da Moena se prejentèa formalmenter, col intervent del ombolt de Moena Angel Weber e del prum president Batistin Techel (Giovanni Battista Volcan).
Da enlouta, pur con vèlch paussa anterite, l boletin »Nosha Jent« l é vegnù fora per 60 egn alalongia: dalbon n record portèr inant per duc chisc egn n sfoi con la soula forzes de n paisc, a cheles che ti ultimes egn se à jontà ite ence l’Union di Ladins de Fascia.
Per chest cedean l Grop Ladin, adum con l’Union di Ladins de Fascia, i pel meter dant na bela neva: ades dut chest material l é stat metù ensema, con n gran bel lurier l é stat enjignà la copies en PDF de duc i numeres e co la firma Smallcodes de Carlo Zoli l é stat enjignà n sistem che permet de troèr fora i articoi sul web chierian per autor, per titol o ence demò con na parola te dut l test.

De più su La Usc stampèda de vender ai 20 de jené.  (Lucia Gross)