La Usc di Ladins

Te la Mont de Poza l é jà dut n busiament. L gran lurier per enjignèr strutures e teaces apede a la tiejes é jà peà via da n trat. Tel Comitat de endrez, al grop che ti ultimes egn à ciapà te man la redenes, ma semper col sostegn de vèlch component ‘storich’, se à jontà ite etres 5 joegn: Gabriele, Riccardo Daniele e Samuele i é jà che i se dèsc ju per endrezèr e Marta la deida per la pèrt aministrativa. Apede a chisc l é amò n bel schiap de fenc che no i fèsc pèrt del Comitat ma i dèsc na man.

Dut chest conferma che, te chisc tempes de crisa te la partezipazion di joegn a la sociazions, l passaje de testamonech per la Festa ta Mont à garatà.

La presidenta Melissa Locatin e Francesco Detomas, che ensema con Luciano Calligari e Nicolò Dorich se à cruzià soraldut de la pèrt culturèla e de la comunicazion, ne à fat a saer colunes che l é la confermes e la neves de chesta edizion numer 17 en program en sabeda ai 3 e en domenia ai 4 de aost.

L argoment cernù per chest an l é »meja« chel vel entener dut chel che pel fèr arpejon. Sul percors de la festa vegnarà metù fora de gregn tulins e ogneun arà per protagonist n oget, per portèr dant a na vida enteressanta, ma gustegola e anterite ence da grignèr, travers foto e scric, mingol de storia e de vita leèda a chest oget, ence travers la ousc de persones che con chest les à, o les à abù, n leam dret.

De più su La Usc stampèda de en vender ai 26 de messèl e su la piata internet www.festatamont.it.

 (Lucia Gross)