La Usc di Ladins

L é oramai belebon cognosciù te Fascia don Luciano Mainini, soraldut te la Val de sot olache bendeché l disc messa te una o l'autra parochies de don Andrea, ma ence te la Val de sora, en particolèr da chi che con el à abù ocajion de jir en pelegrinaje. Nominà sentadin benemerit de Vich del 2014, ades l se sent sentadin onorarie de Sèn Jan. Sion jic a l troèr sun Tamion, te la calonia apede a la gejia de la SS. Trinità, e se aon fat contar mingol de so leam con la val, del istitut religious di Paolini e di pelegrinajes, che l fon leam con Lourdes à fat doventèr l prum empegn de sia vita.

Don Luciano, can siede ruà la pruma outa te Fascia?
Don Luciano Mainini La pruma outa che son ruà l era l 1958, aee 7 egn e ere ghest de le Colonie milanesi a Sèn Jan. L era le monie salesiane che ge stajea do ai bec, e una de cheste monie la era de mie paisc, Càstano Primo, vejin a Busto Arsizio, e la ge à dit a ciasa mia che l era chesta possibilità de far jir i bec en vacanza sa mont. Coscì son vegnù su con autres trei mie jermegn, duc del 1951; sion vegnui su del 1958 e dapò ence del 1959. Del 1960 mie barba, che l se aea enamorà de chesta val, l se à tout n cartier a fit a Sèn Jan te ciasa de chi de Poldin, e sion vegnui su aló fin del 1965. Da enlauta duta mia familia la é semper restada n muie leada a Fascia. Gio dapò son jit te seminarie, son vegnù su te chel cartier amò n an, dapò mia parochia de Saronno, olache endana mia familia se aea tramudà, l'à tout a fit n frabicat sun Chieva a Poza, che ades l é stat tout ite tel Hotel Ladinia. Ti egn che son stat seminarist, fin del 1977 canche ai 25 de jugn son doventà preve, son semper vegnù su te chel frabicat che enlauta l era n muie veie e a la bona. Vegnie su tel meis de messal e ence d'invern, do Nadal, con 60 bec, enveze le beze i le portaa a Ponte di Legno.

Se pel lejer dut su La Usc nr 27 dai 18 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.



 (Lucia Gross)